ភ្នំពេញ ៖ អតីតអ្នកថតរូបទួលស្លែង ដែលមហាជនធ្លាប់បានស្គាល់តាមរយៈសារព័ត៌មាននានានោះ គឺលោក ញ៉ែម អេន បានសម្រេចចេញមុខបង្កើតគណបក្សថ្មីមួយដោយខ្លួនឯង ដើម្បីចូលរួមប្រកួតប្រជែងនៅក្នុងការបោះឆ្នោតជ្រើសតាំងតំណាងរាស្ត្រនាឆ្នាំ២០១៨ ខាងមុខ ហើយការសម្រេចចេញទៅបង្កើតគណបក្សដោយខ្លួនឯងនេះ ដោយសារគោលនយោបាយរបស់គណបក្សមួយចំនួន ដែលលោកធ្លាប់ចូលរួម មិនត្រូវតាមទស្សនរបស់ខ្លួន និងអាចជួយប្រទេសជាតិបាន។
លោក ញ៉ែម អេន បានថ្លែងប្រាប់កម្ពុជាថ្មីកាលពីព្រឹកថ្ងៃទី៣០ ខែមករា ឆ្នាំ២០១៧ថា គណបក្សដែលលោកបង្កើតនេះមានឈ្មោះថា “គណបក្សគ្រួសារខ្មែរ” ដែលមានបាវចនា “ឆន្ទៈ មនសិការ និងឧត្តមគតិ” ហើយការសម្រេចចេញទៅបង្កើតគណបក្សដោយខ្លួនឯងនេះ ដោយសារតែលោកធ្លាប់បានចូលរួមជាមួយគណបក្សមួយចំនួនកន្លងមក គឺគណបក្សទាំងនោះអត់គិតពីផលប្រយោជន៍ជាតិ គឺគិតតែពីផលប្រយោជន៍ខ្លួន បក្សពួក និងគ្រួសារនិយម ហើយបែរជាយកទៅវាយប្រហាររាជរដ្ឋាភិបាល ពីព្រោះចំណុចខ្លះរដ្ឋាភិបាលក៏បានធ្វើល្អដែរ ហើយនៅពេលមកបង្កើតគណបក្សខ្លួនឯង លោកនឹងជួយរដ្ឋាភិបាលទៅលើចំណុច ដែលរដ្ឋាភិបាលបច្ចុប្បន្ននៅមានការខ្វះចន្លោះ ដែលមានដូចជាបញ្ហាគ្រឿងញៀន ល្បែងស៊ីសង បរិស្ថាន ព្រៃឈើ ប្រព័ន្ធតុលាការ ជាពិសេសចំណុចណា ដែលរាជរដ្ឋាភិបាលនៅមានបញ្ហារសើប។
តាមលោក ញ៉ែម អេន អះអាងថា “បងមកបើកគណបក្សនេះ គឺបងយកឧត្តមគតិរបស់បង ដែលបានតស៊ូតាំងពីអាយុ១១ឆ្នាំ ឥឡូវ៥៧ឆ្នាំហើយ គឺយកឧត្តមគតិ និងឆន្ទៈមកដឹកនាំប្រទេសជាតិម្តង ហើយនិងសហការជាមួយរដ្ឋាភិបាល ដើម្បីកសាងប្រទេសជាតិ ឲ្យប្រទេសកម្ពុជានេះ ក្លាយជានីតិរដ្ឋពិតប្រាកដ”។
លោកបញ្ជាក់ថា ការបើកគណបក្សនេះ មិនមានអ្នកណាឲ្យលុយ ឬយកលុយពីអ្នកណានោះទេ គឺជាលុយផ្ទាល់ខ្លួន ហើយយកឆន្ទៈ មនសិការរបស់ខ្លួនមកធ្វើ ហើយ “គណបក្សគ្រួសារខ្មែរ” នេះ មិនកាន់ជើងរដ្ឋាភិបាលទេ តែជួយរដ្ឋាភិបាលដូចជាបញ្ហាគ្រឿងញៀន បរិស្ថាន ល្បែងស៊ីសង និងអំពើពុករលួយជាដើម។
លោក ញ៉ែម អេន លើកឡើងដែរថា ការដែលលោកចាកចេញពីគណបក្សអំណាចខ្មែរនេះ ដោយសារតែគណបក្សអំណាចខ្មែរ ជាសាធារណរដ្ឋ ហើយវាយរដ្ឋាភិបាលរហូត។ តាមមើលប្រហែលជាពួកគេអាមេរិកកាំងសុទ្ធ។
តាមលោក ញ៉ែម អេន គ្មានការដឹកនាំណាល្អជាងសម្តេច ហ៊ុន សែន ទេ ហើយមេដឹកនាំគណបក្សមួយចំនួន ចង់វាយបំបាក់សម្តេចតេជោ ហ៊ុន សែន តែទៅមិនរួច “និយាយទៅគាត់ចោលជាតិ សាសនា ព្រះមហាក្សត្រទៅហើយហ្នឹង ដូច្នេះបងនឹកគិតថា ជាព្រះរាជាណាចក្រកម្ពុជា យើងត្រូវការព្រះមហាក្សត្រ…ដូច្នេះបើចោលព្រះមហាក្សត្រខ្ញុំមិនអាចចូលរួមបានទេ នេះជាមូលហេតុដែលខ្ញុំដើរចេញពីគណបក្សអំណាចខ្មែរ”។
ទាក់ទងដល់ការចូលរួមជាមួយគណបក្សសង្គ្រោះជាតិ លោក ញ៉ែម អេន លើកឡើងថា “លោក សម រង្ស៊ី ជាមនុស្សចោលម្សៀត អត់គិតពីលទ្ធិប្រជាធិបតេយ្យ សេរីពហុបក្សទេ ពួកនេះ បើមានអំណាចវិញ ផ្តាច់ការជាងគណបក្សប្រជាជនទៅទៀត ដោយសារអី មិនទាន់មានអំណាចផង បក្សពួកនិយម អាត្មានិយម ក្រុមគ្រួសារនិយម អត់យកប្រយោជន៍ជាធំផងហ្នឹង។ ដឹងហើយ ពីព្រោះខ្ញុំធ្លាប់ប្រឡូកជាមួយ។ ខ្ញុំជាក្រុមការងារគណបក្សសង្គ្រោះជាតិខេត្តឧត្តរមានជ័យ ដណ្តើមតួនាទីគ្នា ការងារគ្នា ដាក់អានេះ ដាក់អានោះ នេះលុយតិច នេះលុយច្រើន ចឹងគណបក្សនេះ មិនទាន់មានអំណាចផង ប៉ុណ្ណឹងទៅហើយ ទម្រាំមានអំណាចទៀត មិនដឹងយ៉ាងណា និយាយរួមមិនបានម៉ាចំណិតគណបក្សប្រជាជនកម្ពុជាផងទេ ហើយសុទ្ធតែប្រជាធិបតេយ្យ សេរី ពហុបក្ស យករាស្ត្រជាធំណាណី ទៅអត់រួចទេ”។
តាមលោក ញ៉ែម អេន មកដល់ពេលនេះ គណបក្សរបស់លោកបានរៀបចំរចនាសម្ព័ន្ធ ប្រធាន អនុប្រធាន អគ្គលេខាធិការ គណៈកម្មាធិការនាយករួចរាល់ហើយ និងកំពុងរបៀបចំគណៈកម្មាថិការអចិន្ត្រៃយ៍ និងបានរៀបចំសមាជិក សមាជិកា បានចំនួន១៧ រាជធានី ខេត្ត រួចហើយ នៅក្នុងការបោះឆ្នោតជ្រើសតាំងតំណាងរាស្ត្រនាឆ្នាំ២០១៨ ខាងមុខ។
ទោះយ៉ាងណាលោកបញ្ជាក់ថា សម្រាប់ការបោះឆ្នោតឃុំ សង្កាត់ នាពេលខាងមុខនេះ លោកមិនអាចចូលរួមបានទេ ដោយសារពេលវានៅខ្លីពេក ហើយសមាជគណបក្សអាចនឹងធ្វើខែមិថុនា ឬខែធ្នូ ខាងមុខ នៅទីស្នាក់ការកណ្តាល នាភូមិជន្លង់ សង្កាត់សាលាកំរើក ក្រុងសៀមរាប ខេត្តសៀមរាប។
លោក ញ៉ែម អេន ក្នុងនាមប្រធានគណបក្សគ្រួសារខ្មែរបានបញ្ជាក់ថា គោលនយោបាយសម្រាប់គណបក្សរបស់លោកមាន៩គឺ ១- ស្ថាប័នប្រដាប់អាវុធ នៅក្រោមបទបញ្ជា និងគ្រប់គ្រងព្រះមហាក្សត្រ។ ២- ស្ថាប័នតុលាការ ឲ្យអព្យាក្រឹត្យនៅក្រោមបទបញ្ជាគ្រប់គ្រងដោយព្រះមហាក្សត្រ។ ៣- ស្ថាប័ន គ ជ ប ឲ្យអព្យាក្រឹត្យ មិនឲ្យរើសចេញពីគណបក្សនយោបាយ នៅក្រោមបទបញ្ជាគ្រប់គ្រងដោយព្រះមហាក្សត្រ ជាអ្នកចាត់ចែង។ ៤- បេក្ខភាពនាយករដ្ឋមន្ត្រី គណបក្សគ្រួសារខ្មែរ កំណត់ត្រឹមពីរអាណត្តិ (ប្រាំបីឆ្នាំ)។ ៥-និស្សិតបញ្ញាវ័ន ដែលរៀនចប់ថ្នាក់និទេ្ទសល្អ ឲ្យទៅរៀននៅក្រៅប្រទេស យកអាហារូបករណ៍ដោយរដ្ឋ ជាអ្នកចេញថ្លៃចំណាយក្នុងការសិក្សា។ ៦-សន្តិសុខជាតិ គណបក្សគ្រួសារខ្មែរ មានគោលជំហរច្បាស់លាស់ទាក់ទងបញ្ហាគ្រឿងញៀន ចោរ ឆក់ ចោរប្លន់ ចោរលួច ល្បែងស៊ីសងគ្រប់ប្រភេទ និងអំពើពុករលួយ ឲ្យច្បាប់រឹតបន្តឹងឲ្យតឹងរឹងបំផុត ចំពោះជនល្មើសនិងបក្ខពួក។
៧-គណបក្សគ្រួសារខ្មែរ ប្រកាន់គោលជំហរយកលទ្ធិប្រជាធិបតេយ្យ សេរីបក្ស ពហុបក្ស មិនយកខ្មែរណាធ្វើជាសត្រូវ ៨-បញ្ហាកសិកម្ម កសិផល ដែលពលរដ្ឋផលិតបាន ដូចជាស្រូវ អង្ករ ពោត សណ្តែក ដំឡូង និងកសិកម្មផ្សេងៗទៀត រដ្ឋកំណត់ ថ្លៃតាមទីផ្សារជាក់លាក់ គណបក្សគ្រួសារ ខ្មែរ និងឲ្យរដ្ឋទិញពីប្រជាពលរដ្ឋ មិនឲ្យប្រជាពលរដ្ឋបាក់ទឹកចិត្ត និងការបង្កើនផល ទេ ព្រោះប្រទេសខ្មែរជាប្រទេសសម្បូរទៅដោយ កសិកម្ម រដ្ឋជាអ្នកកំណត់តម្លៃច្បាស់លាស់ ឲ្យពលរដ្ឋមានតម្លាភាពទូទាំងប្រទេស ជាប្រទេសសម្បូរទៅដោយកសិកម្ម រដ្ឋជាអ្នកកំណត់ តម្លៃច្បាស់លាស់ ឲ្យពលរដ្ឋមាន តម្លាភាពទូទាំងប្រទេសខ្មែរ ហើយកាត់បន្ថយជន ចំណាកស្រុកឲ្យបានត្រឹម៩៥ភាគរយ ដែលចាកចេញទៅរកស៊ីនៅក្រៅប្រទេស ដែលនាំឲ្យបាត់បង់ធនធានមនុស្សជាច្រើនសម្រាប់កសាងប្រទេសនេះ ជាបន្ទុករបស់រដ្ឋជាអ្នកគ្រប់គ្រង និងកំណត់ប្រាក់ ខែសមរម្យ ទៅតាមសហគ្រាស។ ៩-ទាក់ទងបញ្ហាជនអន្តោប្រវេសន៍គណបក្ស គ្រួសារខ្មែរ មិនប្រកាន់ពូជសាសន៍ ឲ្យរស់នៅស្របច្បាប់ទាមគោលការណ៍ច្បាប់ប្រទេស និងរដ្ឋធម្មនុញ្ញ នៃព្រះរាជាណាចក្រកកម្ពុជា។
សូមបញ្ជាក់ថា អតីតអ្នកថតរូបទួលស្លែង លោក ញ៉ែម អេន នេះ មុននិងចេញមុខបង្កើតគណបក្សថ្មីមួយដោយខ្លួនឯង ដើម្បីចូលរួមប្រកួតប្រជែងនៅក្នុងការបោះឆ្នោតជ្រើសតាំងតំណាងរាស្ត្រនាឆ្នាំ២០១៨ ខាងមុខនេះ លោកបានចូលរួមនយោបាយជាមួយគណបក្សជាច្រើន ដែលមានដូចជា គណបក្សសង្គ្រោះជាតិ គណបក្សប្រជាជនកម្ពុជា និងគណបក្សអំណាចខ្មែរជាដើម៕
កម្ពុជាថ្មី
កោះកែវ
No comments:
Post a Comment