 |
| ក្រុមប្រឹក្សាធម្មនុញ្ញ (រូបភាពពី The Cambodia Daily) |
ក្រុមប្រឹក្សាធម្មនុញ្ញ ប្រកាសបិទផ្លូវតវ៉ា ករណីបណ្តឹងសាទុក្ខ របស់គណបក្សប្រឆាំង ដែលសុំលុបឈ្មោះ ជាជនជាតិវៀតណាម ប្រមាណជាង៧០នាក់ ចេញពីបញ្ចីបោះឆ្នោត នៅក្រុងព្រះសីហនុ ដោយស្ថាប័នកំពូលមួយនោះ សំអាងថា ភាគីដើមបណ្តឹងគ្មានភស្តុតាងផ្លូវច្បាប់។
អំឡុងបិទប្រកាសបញ្ជីឈ្មោះបោះឆ្នោតដំបូងនេះ គណបក្សសង្គ្រោះជាតិ បានប្តឹងជំទាស់សុំឲ្យលុបឈ្មោះមនុស្សប្រមាណ២៥០០នាក់ នៅទូទាំងប្រទេស ចេញពីបញ្ជីបោះឆ្នោតវិញ ដោយអះអាងថា អ្នកទាំងនោះប្រើអត្តសញ្ញាណប័ណ្ណសញ្ជាតិខ្មែរ ទៅចុះឈ្មោះបោះឆ្នោតមិនបានបំពេញលក្ខខណ្ឌនៃការចូលសញ្ជាតិខ្មែរត្រឹមត្រូវ។
ប៉ុន្តែ គជប មិនបានលុបឈ្មោះមនុស្សណាម្នាក់ចេញពីបញ្ជីបោះឆ្នោតទៅតាមបណ្តឹង របស់បក្សប្រឆាំងទេ ដោយ គជប អះអាងថា ការស្វែងរកការពិតនៃការចូលសញ្ជាតិ ជាតួនាទីរបស់ក្រសួងមហាផ្ទៃ និងបើកផ្លូវឲ្យបក្សប្រឆាំងប្រឹងសាទុក្ខទៅក្រុមប្រឹក្សាធម្មនុញ្ញ។
នៅថ្ងៃទី៣០ខែមករានេះ ជាថ្ងៃដំបូងដែលក្រុមប្រឹក្សាធម្មនុញ្ញ បានបើកសវនាបណ្តឹងសាទុក្ខចំនួនពីរ របស់គណបក្សសង្គោះជាតិ ដែលមិនសុខចិត្ត ករណីដែលគជបមិនព្រមលុបឈ្មោះមនុស្ស៧៦នាក់ នៅក្រុងព្រះសីហនុ ចេញពីបញ្ជីបោះឆ្នោត។
ក្រោយសួរដេញដោល ទៅកាន់ភាគីតំណាង គជប និងភាគីដើមបណ្តឹង របស់គណបក្សសង្គ្រោះជាតិ ប្រធានក្រុមប្រឹក្សាធម្មនុញ្ញ លោក អ៊ឹម ឈុនលឹម ប្រកាសថា ក្រុមប្រឹក្សាធម្មនុញ្ញ គ្មានលទ្ធភាពស្វែងសុច្ចរិតភាពនៃការចូលសញ្ជាតិ តាមបណ្តឹងសាទុក្ខ របស់ដើមបណ្តឹងនោះទេ។
លោក អ៊ឹម ឈុនលឹម បញ្ចាក់ថា ការមិនលុបឈ្មោះមនុស្សដែលគេសង្ស័យថាជាវៀតណាមចេញពីបញ្ជីបោះឆ្នោត ដែល គជប បានចេញសេចក្តីសម្រេចកន្លងទៅ លោកថាជារឿងត្រឹមត្រូវតាមទម្រង់ច្បាប់ និងបិទផ្លូវតវ៉ា។
លោក អ៊ឹម ឈុនលឹម អះអាងទៀតថា ការប្តឹងនរណាម្នាក់ថា ជាជនជាតិវៀតណាម សំអាងត្រឹមថា និយាយភាសាខ្មែរមិនច្បាស់ ហើយគ្មាន ឯកសារស្តីពីការចូលសញ្ជាតិមកបញ្ជាក់ ដល់ក្រុមប្រឹក្សាធម្នុញ្ញលោកថាមិនអាចពិចារណាបាន។
អគ្គលេខាធិការ គជប លោក ទេព នីថា ដែលចូលការពារសេចក្តីសម្រេច របស់គជប បានសារទរទៅនឹងការសម្រេច របស់ក្រុមប្រឹក្សាធម្មនុញ្ញនេះ ដោយចាត់ទុកថាការសម្រេច នេះថាស្របតាមច្បាប់ស្តីពីការបោះឆ្នោត។
លោកថា៖«ខ្ញុំយល់ថា ការអនុវត្តនេះ គ្រាន់តែជាការអនុវត្តទៅតាមច្បាប់ និងទៅតាមសមត្ថកិច្ចនៃការដោះស្រាយពាក្យបណ្តឹងទាក់ទងនឹងការចុះឈ្មោះបោះឆ្នោត»។
មេធាវីដើមបណ្តឹងដែលការពារឲ្យគណបក្សសង្គ្រោះជាតិ លោក ផែង ហេង បង្ហាញការខកចិត្តទៅនឹងការសម្រេច របស់ក្រុមប្រឹក្សាធម្មនុញ្ញនេះដោយថា ការស្វែងរកការពិតពីការចូលសញ្ជាតិ លោក អាចមានប្រយោជន៍ពីរយ៉ាង គឺជួយបញ្ជាក់ពីគុណភាពនៃបញ្ជីបោះឆ្នោតផង និងអាចបង្កើនថវិកាជាតិ បើរដ្ឋាភិបាលពង្រឹងពីការអនុវត្តច្បាប់ស្តីពីការចូលសញ្ជាតិនេះបានត្រឹមត្រូវ។
លោកថា៖«យើងចេះតែនាំគ្នាមើលស្រាយ ហើយប្រជាពលរដ្ឋគ្នាសកម្មចូលរួមប៉ុណ្ណឹងហើយយើងអត់នាំគ្នាគាំទ្រការប្តឹងហ្នឹង រយយុត្តិធម៌ឲ្យបានត្រឹមត្រូវទៅ ហើយការស្រាវជ្រាវវាអត់ច្បាប់លាស់ ហើយការសម្រេចតាមតែពេលវេលា ដោយសាតែនីតវិធី អាហ្នឹងគ្រាន់តែជាការដោះសារមួយការរកយុត្តិធម៌ក្នុងបណ្តឹងវាអត់ត្រឹមត្រូវវាអត់គ្រប់គ្រាន់»។
ទោះជាយ៉ាងណាក្រុមប្រឹក្សាធម្មនុញ្ញត្រូវការពេលវេលាច្រើនថ្ងៃទៀត សម្រាប់ដោះស្រាយបណ្តឹងទាស់ របស់គនបក្សសង្គ្រោះជាតិនេះ មុន គជប ប្រកាសសុពលភាពបញ្ជីបោះឆ្នោត។
សមាជិកសម្ព័ន្ធកំណែទម្រង់ការបោះឆ្នោតឆ្នោត លោក យង់ គិមអេង ធ្លាប់លើកឡើងដែរថា ស្ថាប័នពាក់ព័ន្ធ គួរតែសហការគ្នា លាងជម្រះមន្ទិលសង្ស័យពីបញ្ហាវត្តមានជនបរទេស មិនស្របច្បាប់ទៅបោះឆ្នោតជ្រើសរើសមេដឹកនាំជំនួសខ្មែរពីពេលនេះ ដើម្បីផ្តល់ជំនឿដល់មហាជនទូទៅ ជាជាងគេចយករួចខ្លួន ហើយទុកបញ្ហានេះឲ្យនៅបន្តកើតមានក្នុងសង្គមខ្មែរ៕
VOD
ដោយ លោក ញឹម សុខន
No comments:
Post a Comment